O CONCELLO SACA A LICITACIÓN A OBRA PARA RENOVAR A CUBERTA DO PAVILLÓN DO VICENTE OTERO VALCÁRCEL

posted in: Novas Concello | 0
O Concello de Carral acaba de sacar a licitación a renovación da cuberta do pavillón do Vicente Otero Valcárcel. O proxecto, que pronto se converterá nunha realidade, dará resposta a unha demanda que os pais e nais do alumnado levaban tempo solicitando ao antigo equipo de goberno.
Trátase dun procedemento de urxencia, polo que as empresas poderán presentar ofertas ata o próximo 20 de agosto. Posteriormente, as obras deberán executarse no prazo dun mes co obxectivo de interferir o menos posible no desenvolvemento do curso escolar.
O proxecto que se acometerá no pavillón do colexio incluirá a substitución da cuberta existente e a colocación dunha nova de panel sándwich para mellorar as condicións de impermeabilización e o illamento térmico e acústico da instalación. Así mesmo, substituiranse o caleiro e as baixantes existentes por outros novos.
Esta obra acometerase con dous obxectivos: darlles resposta ás demandas da comunidade educativa e seguir traballando para mellorar as infraestruturas dos centros de educación do municipio.
O orzamento total da intervención é de 73.883 euros, dos cales, a Secretaría Xeral para ou Deporte dá Xunta de Galicia achegará 52.983, mentres que o Concello asumirá a contía restante.