A concellería de deportes agarda xuntar a máis de 150 patinadores nesta xornada festiva que xa tradicional no outono carralés. Read more
O Club de Lectura de Carral comeza de novo as súas xuntanzas. As sesións do club celébranse quincenalmente, os mércores en horario de 19:00 a 20:30 horas e fórmano un grupo de persoas que gozan coa lectura e comparten as súas opinións arredor dos libros.
Os interesados en participar poden anotarse na Biblioteca Pública Municipal da Casa da Cultura ou chamar ó teléfono 981 672 580.
As actrices Marián Bañobre e Isabel Risco, da compañía Ibuprofeno Teatro, presentan este sábado O Furancho, escrita e dirixida por Santiago Cortegoso. A función será no local Xente Nova de Tabeaio, ás 20:30 h.
O Furancho é unha obra teatral cargada de “agroglamour” no que se fusiona a estética máis “trendy” con elementos propios da máis pura tradición, como os zocos e o pololo. Cada un dos detalles é parte dun todo harmónico configurado a partir de estilismos minimalistas e cálidos que sintetizan o pasado co presente, o rural co cosmopolita, o loureiro coas novas tecnoloxías. Dúas mulleres fortes, con carácter e desbordante personalidade, que definen á perfección a esencia enerxética e desvergonzada das pallasas: dúas iconas femininas fonte de inspiración para todas esas loitadoras que son quen de poñer o mundo patas arriba para lograr que os seus soños se fagan realidade.
Este espectáculo está incluído no ciclo Teatro de Outono que organiza a Concellería de Cultura do Concello de Carral.
A entrada é libre e o aforo limitado. Unha vez comezada a función non se permitirá o acceso á sala.
A sala de exposicións do edificio social Toñito Espiñeira acolle ata o 28 deste mes unha mostra sobre o patrimonio construído do Camiño Inglés. Son 34 obras en augatinta de José 
Yañez Rodríguez, que recompilan os principais elementos arquitectónicos do Camiño de Santiago que parte desde Ferrol e da Coruña.
Esta exposición, titulada Olladas do Camiño Inglés, está promovida pola Deputación da Coruña coa colaboración da Concellería de Cultura do Concello de Carral.
Como cada ano por estas datas, a Biblioteca Municipal pon en marcha as actividades de animación á lectura dirixidas ós máis pequenos da casa.
Trinketrinke Teatro, será a compañía encargada de presentar cada mes un contacontos protagonizado pola familia dos Ratos de Lonxedetodo, vellos coñecidos de todos os nosos usuarios.
Nesta ocasión, será unha sesión moi especial pois visitarannos dous membros da familia Ratoncia que nos presentarán “Ovos, letras e galiñas”. Estarán na Biblioteca Pública Municipal o xoves 19 de outubro ás 6 da tarde.
A función está dirixida a nenos e nenas de 3 a 8 anos e será necesario recoller a invitación na Biblioteca Municipal ou na Biblioteca Infantil.
O grupo Percubebé estará este sábado no edificio social Toñito Espiñeira co seu espectáculo de música e estimulación sensorial dirixido a nenos de ata 3 anos.
Percubebé, con Marcelo Dobode e Bea Martínez, relacionarase cos bebés a través da música tradicional, empregando os instrumentos da nosa cultura que mellor se adapten a esta idade e xogarán cos diferentes timbres dos instrumentos, así como coas dinámicas, ritmos e estruturas harmónicas. Escoitarán así os diferentes timbres, dinámicas e demais, desenvolvendo así a capacidade auditiva dos bebés. Farán exercicios de coordinación de mans e xogos de movemento para desenvolver a coordinación motriz necesaria para ir interiorizando o pulso. E farán algunha danza para que desenvolvan a capacidade de movemento.
O aforo do espectáculo é limitado. A entrada é de balde e é necesario retirar os convites previamente na Casa da Cultura. Cada bebé pode ir acompañado de dúas persoas.
Esta función está incluída no programa Teatro de Outono que desenvolve o departamento municipal de Cultura.
Ángela Triana actuará na última sesión dos Venres de Monólogo, o 6 de outubro, ás 21:00 h. no edificio social Toñito Espiñeira.
Poucas son as mulleres que se adican a isto do humor, pero Ángela Triana é unha das cómicas máis emerxentes da escea galega, cun monólogo fresco e dinámico no que fala sobre a súa infancia e xuventude. Risas aseguradas.
O delirio cómico comeza cando Ángela laméntase de non ter “aldea” como o resto dos seus compañeiros e compañeiras de infancia. Algo imperdoable na Coruña dos 80 e 90. Despois da súa infancia cóntanos como afrontou a súa xuventude e agora a transición á vida adulta, coa cantinela que ten que escoitar todos os días de que se lle vai pasar o “arroz”. Fálanos desas conversas coas súas amigas xa “mamás” e dos seus fillos “listísimos” e dunha manchea de situacións embarazosas que lle toca vivir a unha muller que chega ós 30.
Con Ángela Triana remata a cuarta edición dos Venres de Monólogo, organizado pola Concellería de Cultura, e no que tomaron parte Cándido Pazó, Lois Pérez e Celso Fernández Sanmartín. Co éxito acadado en todas as funcións, consolídase este ciclo na programación cultural municipal anual.
O narrador Lois Pérez é o terceiro protagonista do programa Venres de Monólogo que se está a desenvolver no edificio social Toñito Espiñeira. Historias da corripa é o título do seu repertorio de contos e historias populares, tanto rurais como urbanas, antigas e modernas.
Lois Pérez iniciará o seu espectáculo ás 21:00 h. deste venres 29 de setembro. A entrada é de balde e o aforo limitado. Prégase puntualidade.
A compañía Sarabela Teatro presentará en Tabeaio a súa obra O secuestro da bibliotecaria, basada no conto co mesmo título e dirixida a público familiar. Con este espectáculo a Concellería de Cultura inicia un novo ciclo Teatro de Outono, no que tomarán parte sete funcións. Sarabela abriráo este sábado, ás 19:30 h. no local Xente Nova.
O programa continuará con Percubebé, unha función para nenos e nenas de 0 a 3 anos, no edificio social Toñito Espiñeira, o sábado 7 de outubro, no que a música será o principal estímulo. Para este caso, e dado que o aforo é especialmente limitado, será necesario retirar os convites na Casa da Cultura nos dous días anteriores.
Teatro de Outuno ofrecerá ademais obras das compañías Ibuprofeno Teatro coa súa exitosa obra O furancho (21 de outubro), a carralesa Charamusca Teatro estreando La oportunidad (29 de outubro), Malasombra Teatro presentando D.E.P. (4 de novembro), Manicómicos coa súa nova obra A orquestra do mar (18 de novembro), e O Aturuxo de Melpómene con Terapia de bar (2 de decembro). A comedia domina o ciclo e hai espectáculos para todas as idades.
En todas as funcións a entrada é de balde, mais una vez iniciada cada función xa non se poderá acceder á sala.
No último custrimestre do ano a Concellería de Cultura incide especialmente na súa programación coas artes escénicas, cos programas de Venres de Monólogo que rematará o 6 de outubro, o festival Galicreques que pasará por Carral o 26 e 27 de outubro, e o ciclo de teatro que comeza esta semana. Contacontos, cine, exposicións e música completarán a oferta cultural ata final de ano.