Despois de 23 edicións, o Premio de Poesía Concello de Carral ten a súa fama e recoñecemento máis que gañados. Porén, co obxectivo de mellorar este certame ano tras ano, o goberno local acaba de pór en marcha unha enquisa para avaliar os puntos fortes e débiles deste concurso, unha medida que nunca se levara  acabo en concursos similares. Esta novidosa iniciativa busca medir o impacto do premio no sector literario de Galicia e comprobar, así mesmo, se se están a cumprir os obxectivos cos que naceu: contribuír á promoción da literatura galega en xeral e á poesía en particular e de novos autores e autoras. Este certame naceu, ademais, para promover a lectura entre os veciños e veciñas do municipio.

Baixo a premisa de que esta investigación sexa o máis pertinente posible, elaboráronse diferentes tipos de enquisa en función do público destinatario:

1. Para os autores e autoras que gañaron algunha edición do Premio de Poesía do Concello de Carral.
2. Para poetas de Galicia en xeral.
3. Para editoriais galegas que se dediquen a publicacións de libros de poesía.
4. Para persoas que conformaran o xurado do certame nalgunha das edicións.
5. Para librerías.
6. Para organizadores doutros concursos de poesía de Galicia.
7. Para veciños e veciñas de Carral en xeral.

Unha vez que se analicen todos os resultados, o obxectivo é expor publicamente as principais conclusións e compartilas na páxina do Concello de Carral. A previsión do Concello é, ademais, facer unha xornada o día 14 para presentar os datos, poñéndoos en común con poetas, editores, libreiros e especialistas.

Os carraleses e carralesas que desexen deixar a súa opinión e aportar o seu gran de area á iniciativa poderán facelo a través da web do Concello.

Convocatoria aberta ata o 3 de abril

O Concello de Carral, a través do seu departamento de Cultura, xa convocou unha nova edición do seu Premio de Poesía, que está dotado con 2.500 euros e a publicación da obra gañadora en Edicións Espiral Maior.

Esta nova edición do premio contempla un prazo para presentar exemplares aberto ata o 3 de abril. Poderán presentar obras os autores e autoras maiores de idade, con poemarios cun mínimo de 500 versos escritos en lingua galega.

O novo equipo de goberno recibiu esta semana a resposta ás alegacións ao Plan de Transporte Público da Xunta presentadas no mes de agosto. A Consellería de Transporte e Mobilidade anunciou, hai uns días, importantes novidades en materia de mobilidade que supoñerán, tal e como indican desde o goberno local, “unha gran mellora nos desprazamentos diarios dos veciños e veciñas de Carral”. Entre elas, alcanzou o compromiso da Xunta para reforzar as liñas que conectan Carral coa Coruña, Betanzos e Cambre. Con todo, tal e como sinala o equipo de goberno, “aínda quedan moitas cousas que mellorar en materia de transporte”. Así mesmo, tal e como puntualiza o goberno, “algunhas dás peticións que fixemos non se responderon coas condicións esixidas”.

Por unha banda, o goberno conseguiu a mellora da conexión cos institutos de Betanzos mediante a ampliación da liña Xeixade-Betanzos a Tabeaio e a adaptación do horario da mesma. No mes de agosto, o equipo de goberno solicitou, precisamente, a ampliación desta liña para que pasase por Tabeaio, segundo núcleo con maior poboación de Carral. O goberno local lamenta que, a pesar das súas reiteradas peticións, esta parroquia siga sen ter conexión directa co IES David Buján (Cambre).

Esta liña é moi utilizada polos mozos que estudan nos institutos da cidade. Por esa razón, o goberno segue vendo as frecuencias do autobús “moi xustas”.

Doutra banda, lográronse seis novas expedicións na liña que une o municipio coa Coruña (catro máis de luns a venres e dous os domingos e festivos). Así mesmo, o goberno alcanzou o compromiso de que se mellorará a funcionalidade dos roteiros que conectan o municipio coa Coruña mediante a alternancia de expedicións entre as liñas que teñen como orixe Carral (Panteón) e Santa María de Vigo.

Outra das solicitudes do goberno local foi a mellora da liña Os Campóns- Carral (Panteón), que os veciños e veciñas utilizan para acudir ao PAC de Cambre. O goberno conseguiu catro novas expedicións que se realizarán durante as fins de semana e festivos.

Unha das novidades máis importantes será para os veciños e veciñas de Cabrois, que dispoñerán dunha parada nas liñas que conectan Entrexardíns e a Urbanización Monte Xalo.

Tal e como explica o goberno, a conexión das parroquias de Carral co núcleo urbano segue sendo “unha conta pendente, e seguiremos traballando para conseguilo”. Ademais, o equipo de goberno segue vendo “insuficiente” a conexión do concello cos hospitais da Coruña (CHUAC, Materno e Abente e Lago).

Por último, o goberno conseguiu que se inclúa unha parada antes do outlet do Corte Inglés e outra no Polígono Vos Capelos.